عبر الإعلامي سيد أبو حفيظة عن سعادته الشديدة لفوز المنتخب المصري على الإيطالي في مباراة الخميس الأول من أكتوبر بأربعة أهداف مقابل هدفين.
وقال الفنان الكوميدي أكرم حسني، وهو يجسد شخصية أبو حفيظة خلال وجوده في ملعب استاد القاهرة الخميس بعد فوز مصر: "طبعا أنا سعيد جداً جداً .. الكشري المصري كسب البيتزا الإيطالي يا جماعة".
وتعليقاً على أداء الفريق، قال أبو حفيظة: "أنا واخد على خاطري من طلعت .. لو فك الاستك اللي في شعره ممكن الأداء يبقى أظرف، وبوجي مُـشرف بعيدا عن طمطم، وعفرتو عالمي".
ولكنه أضاف: " بس أنا مبسوط منهم إنهم سمعوا النصايح اللي قولتلهم عليها في المعسكر قبل أول مباراة".
وأفصح أبو حفيظة عن بعض من تلك النصائح التي وجهها لمنتخب شباب مصر، قائلاً: "المنتخب دايماً بيلعب بطريقة 442، أنا قلت لهم يلعبوا المرة دي 444، هنلعب 12 بدلا من 11، 3 منهم في الجون والباقي هيقفوا صف واحد جنب بعض عند الأوت عشان مش عايز ولا كورة تطلع بره".
وتابع: "وبفكر عشان نضمن ولا جون يخش فينا هنتفق مع مجموعة من طيفة المعمار هييجوا يمحرولنا الجون وبكده نضمن إن شاء الله ولا كورة هتخش فينا".
وتابع: "وأنا مقدم طلب للفيفا ننزل مع لاعيبة مصر بس موبايلات عشان هما مش قاريين الملعب، فكل لاعيب فيهم لما يكون مقرب من خط الـ18 وعايز يباصي الكورة لزميله يديله رنة فياخد باله منه ويبص له عشان ياخدها منه".
ثم حث أبو حفيظة اللاعبين ليتابعوا نصرهم قائلاً: "أحث اللاعبين وبقولهم لا بديل عن مربع الذهب، وأنا هاكون موجود في كل ماتش معاهم".
جدير بالذكر أن أبو حفيظة – أكرم حسني - يقوم بتسجيل حلقة خاصة من برنامجه "الكورة مع أبو حفيظة" بعد كل مباراة لمنتخب مصر تذاع على قناة مودرن سبورت في الساعة العاشرة مساءً، وأن الحلقة التحليلية لمباراة مصر مع إيطاليا ستذاع مساء الجمعة الثاني من أكتوبر.
تعليق المحرر
وانا من جهتي بأطالب الفيفا بصرف دي في دي لكل لاعب مع شقة ايجار جديد وبالمره نجيبلهم صوفيا لورين بعد كل ماتش تعملهم مساج
