كتب يوسف معاطى
مناظرة يا ست
"كم أتعجب من هؤلاء الأمريكان في ممارستهم للديمقراطية !! , ما إن تقترب الأنتخابات حتي يصبح لا حديث في العالم كله سوي الأنتخابات الأمريكية , و يبدأ كل مرشح في عرض وجهة نظره في مناظرات تلفزيونية أما الدنيا كلها .. و كم يستمتع الشعب الأمريكي و هو يري رجلين يتصارعان علي كرسي الرئاسة في مباراة كلامية طاحنة تبدو أكثر إثارة من مصارعة الثيران في أسبانيا.. فالفائز هنا لن يحكم أمريكا فقط .. و إنما سيحكم العالم كله
و خلال تسعين دقيقة و هي مدة المناظرة سنسمع كلاما رائعا عن السلام و حقوق الأنسان و المساعدات التي يعتزم كل منهما تقديمها للأطفال و العجائز في كل مكان علي الأرض .. و في نفس الوقت تسقط فيه اّلاف الضحايا من الاطفال و العجائز تحت قصف الصواريخ و القنابل الأمريكية !!
و طالما أن السياسة الأمريكية تنتهي دائما إلي نفس القرارات و نفس النتائج , فإني أري -حفاظا علي وقت المواطن الأمريكي- أن تتبع أمريكا طريقة (الأستفتاء) في أختيار الرئيس القادم , و هي طريقة "أريح" و مضمونة النتائج .. فسواء كان بوش هو القادم أو كيري .. فأي منهما سيجلس علي المكتب البيضاوي في البيت الأبيض .. سيدوس علي الجرس فيدخل الفراش باسما .. نهاره أبيض يا ريس .. شاي و للا قهوة و للا نسكافيه ؟! , و هو (سيم) أو (شفرة) تعني السودان و للا أفغانستان و للا إيران ؟!!
و أي رئيس بغض النظر عن أي مناظرات أو حبشتكانات لابد و أن يكون واقعا في حب إسرائيل لشوشته .. فعلام يتناظرون ؟! , ان كيري في المناظرة كان يعترض علي قرار بوش بالحرب علي العراق و في نفس الوقت يقول له بوش : ما انت كنت موافق علي الحرب و صوتّ علي الهجوم , جاي دلوقتي تعمل لي فيها سلاميكي !! , فيرد كيري : ما هو أنا لازم أعترض علي أي حاجه يا عم بوش .. يعني عاوزني أقول ان انت رئيس كفاءة و ميه ميه , أمال أرشاح نفسي قصادك ليه؟! فيصرج بوش محتدا :كفاية إن انا نزلت جبت صدام من الحفرة و حطيته في السجن , مش العالم بأه أحسن من غير صدام؟! هنا أشتعلت المناظرة و ألتهبت الأكف بالتصفيق .. و بدأ الأفق أن بوش سجل نقطة ضد كيري .. قال مدرب كيري و هو يهوي عليه بالفوطة .. ما يهمكش .. خش عليه , و انبري كيري قائلا : طيب و بن لادن يا معلم ؟! خد دي .. فين بن لادن ؟! ما مسكتوش ليه؟؟!!
و هنا يقول المذيع : مستر بوش أمامك دقيقتين لتجيب علي هذا السؤال , يرد بوش حائرا : دقيقتين !!! , دا أنا بقالي ثلاث سنسن مش عارف أجاوب عليه .. ثم يهتف لكيري ساخرا : يعني أنت بأه إللي هتجيبه؟! , هنا تبدأ المظاهرة في التحول إلي تلقيح الكلام و ندخل في نطاق الأدب الساخر ,.. حينما يصرخ بوش : أسمع يا كيري .. أنا أمريكا كلها عارفة أنا مين .. أربع سنين ماشي زي الألف .. لا ووترجيت و لا مونيكا و لا حد مسك علي بوش حاجه و لا شاف عليه حاجه .. أنا كبيري باخد العيال في المزرعة و أروح أصطاد .. من البيت للبيت الأبيض و من البيت الأبيض للبيت .. و الحمد لله احنا مش واخدين حاجه من الرياسة و معانا فلوس تعيشنا ملوك .. و من ساعة ما كان الحاج أبويا كان رئيس أمريكا و البيت الأبيض بيتنا و علي بابه عنبتنا لها خضرة و ضليلة بترفرف علي العيلة و بنضرب يا حليلة , و أنت فاكر الرئيس في أمريكا بيقبض كام يعني ؟! , ده كلينتون طالع مديون .. مش صاحبك ؟! أسأله .. هوه لولا الزنقة إللي هو فيها كان ألف كتاب "حياتي" يا عين ده !! ده مألفه خلصان حق و مقطعين له شيكات كان كاتبهم علي نفسه .. هي الرياسة دي أَمََلَه؟! , دي هم ما يتلم .. أنا بقالي أربع سنين ماخدتش العيال و رحنا سينما .. لحد من كام يوم قلبوا دماغي .. روحنا شفنا فيلم أسمه فهرنهايت .. بتاع واحد أسمه مايكل مور .. الجدع مقطع فيا كأني قاتل أمه .. و نازل بيه ع الأنتخابات و أنا في البولليكة دي .. طب و حياة أمه لو نجحت و كملت في البيت الأبيض.. لأخلي أيام أمه سودة ,,
هنا أعلن المذيع أنتهاء المناظرة , .. و قال المحللون أنها أنتهت لصالح كيري بالنقاط لأن بوش كان عصبيا و كان في موقف دفاع دائما .. ما أروع المناظرات ..
و يبدو أن المناظرات الأمريكية سيكون لها أثرها في الشارع العربي و كلكم طبعا تتابعون شعبان عبد الرحيم و فرقة ميامي و هما يقدمان مناظرة كويتية مصرية لها دوي في الشارع .. و ها هي مناظرات العري و الكليبات إياها تشغل الرأي العام كله .. إذن .. لنعمم التجربة .. قلت لزوجتي .. كفانا خناقا و زعيقا يا مدام .. لنتناظر .. أنا زوج جمهوري و أنت زوجة ديمقراطية.. لنعقد مناظرة أسبوعية يتناول فيها وجهات النظر بشكل حضاري ..
مدة المناظرة ساعة و نصف .. غير مسموح لأي منا بأن نتكلم أكثر من دقيقتين متواصلتين .. غير مسموح رفع الصوت بتاتا .. محظور أستعمال الشبشب أو أي ألات حادة .. كان عنوان المناظرة "هل يحق للزوج بعد سبع سنين من الأخلاص و الوفاء .. أن يضفي علي حياته العاطفية تغييرا بسيطا ؟!"
و قد أنتهت المناظرة بيني و بين زوجتي .. بفوز زوجتي ليس بالنقاط و لكن بالضربة القاضية.. معرفش إيه اللي جاب المكواة - جبت المناظرة بس !!! "
