بصراحة انا قريت موضوع وحبيت اني انشره هنا في المدونة واشوف راي البنات فيه لانه بصراحة موضوع مضحك مبكي في نفس الوقت وده الموضوع علي لسان بنت بتقول
حبيت أفضفض معاكوا قبل ما اتجنن ، فى حاجة دايما أفكر فيها مضيقاني ، بصراحة حاجة تخنق ، ليه البنت دايما بتتعرض للبيع من أهلها لما يجي عريس لقطة ويبقوا عايزيين يتخلصوا منها ، والبيت يرفع حالة حظر فى انتظاره ، ويستحموا ويتشيكوا كأن "العيد جانا" ، أما البنت عليها أن تظهر فى اجمل صورة ، وكل المحظورات مباحة بالمقارنة بالأيام اللي بتنزل فيها للجامعة كله فيها ممنوع زي الهدوم الضيقة والماكياج ، لكن دلوقتى كله مصرح بيه ، ودا طبعاً علشان خاطر عيون التاجر اللي جاي يتفحص ويتمحص كل منطقة وياسلام لو تمكن الردار الرجالى من الوصول إلى كل كبيرة وصغيرة.. مين أده تاجر شاطر
وطبعا بعد ما الباشا يجي ، ويجيب معاه الميكرسكوب البصاص اللى هي امه طبعاً والله أعلم الواحد حظه هيقع على ايه ، يا نعجب أو منعجيبش وفى الحالتين بيبقي منظر البنت مش كويس لأنها حاسة ان فى واحد بيتفرج عليها ، وبتتصرف على غير طبيعتها ومطلوب منها الابتسامة ،وفي الاخر يتوقف الاختيار على الراجل هو اللى يحدد ايوة ولا لا .. وممكن يفضل معلق الناس لحد ما يشوف عروسة تانية وتالتة وينقي منهم والموقف دا حصل فعلاً مع واحدة صحبتى ، كل شوية يختفى ويرجع ويقولها نفكر شوية وفى الآخر طلع بينقي كأنه واقف فى سوق الخضار.
علشان كدة فكرت في فكرة ممكن كتير من الأمهات متوافقنيش عليها ، ليه البنت كمان ميبقاش من حقها أنها تتقدم وتخطب أي شخص عجبها زيها زي الراجل ، أو تبعت حد يلفت نظره ليها هى مش من حقها تختار ، محدش يقولي كرامة البنت لأن كدة كدة كرامتها ضاعت فى طريقة الجواز اللى بيسموه صالونات ودا طبعاً من وجهة نظري.
تعليق المحرر
وايه المانع لما البنت تتقدم يعني واهي تاخد ابوها وامها الميكرسكوب بالمرة وتشوف الواد معاه كام وحيلته ايه وابوه بيشتغل ايه وتتقدم ويا بخت من وفق راسين في الحلال بنت تتقدم ولا ولد يتقدم مش هتفرق اهو حاجه التوافق
عجبت لك يا زمن
